Mbola mahatazona ny vokatra tsara kalitao, haitao nolovaina avy amin'ireo ray aman-dreny tany aloha, amin'ny asa tanana vita amin'ny landy ny kaoperativa "Landy Avotra" ao Kelifaritra, Kaominina Ambanivohitra Ambohitrabiby, Distrikan'Antananarivo-Avaradrano.
Kaoperativa miara-miasa amin'ny Foibe FAFIALA ho fanomezan-danja ity asa tanana tena malagasy ity. Misokatra azon'ny rehetra tsidihana ny tranon-dandy nahorin'ny Foibe FAFIALA eny amin'ny foiben-toerany eny Ambohimangakely nanomboka ny volana ôktôbra lasa teo. Hita ao avokoa ny vokatry ny kaoperatiba "Landy Avotra" sy ny fahaiza-manaon'ireo mpanao asa tanana mivelona aminy.
Ankohatra ny fampirantiana sy ny fivarotana ireo asa tanana vita avy amin'ny landy, dia toerana natao hanomezan-danja ny fizahan-tany eto Analamanga koa ny tranon-dandy eny Ambohimangakely hoy ny filohan'ny kaoperativa "Landy Avotra" Rakotoariniaina Rodin.
