Manjaka ny fahapotehan'ny ala ao amin'ny tandavan'alan'Angavo, noho ny fanaovana tavy sy doro ala ka hanairan'ny mpiaro ny tontolo iainana ireo tompon'andraikitra handray fepetra. Tandindomin-doza ny famokarana manoloana izany hoy Andriamatoa Rakotondrazaka Jean de Dieu, filohan'ny fikambanana FIKITAMA, FIkambanana KIadin'ny TAntsaha Mangoro. Miharitra mantsy ny renirano manondraka ny famokarana.

Tamingan'ala sisa no tavela ao amin'io faritr'ala io hoy Andriamatoa Rakotondrazaka Jean de Dieu, mpisehatra amin'ny fiaraovana ny tontolo iainana. Ny tandavan'alan'Angavo no hany ala voajanahary ao amin'ny Faritra iraisan'i Faritra Analamanga sy Mangoro ao amin'ny distrika Moramanga...

Ho avy indray ny main-tany ka misy amin'ireo tantsaha no mivelona amin'ny tevy. Tsy manao aro afo nefa izy ireo rehefa manao izay tevy ala izay ka lasa mihitatra mandoro ny ala rehetra mbola maniry. Atahorana hatrany ny mbola hitaran'ny fahapotehana manoloana izany.

Manampy trotraka ankohatr'izay ny tsy fahampian'ny orana. Mandalo fahasahiranana ny renirano manondraka ny fambolen'ny tantsaha dia reniranon'i Sandranety hoy ny filohan'ny FIKITAMA. Renirano efa miharitra ihany koa noho ny fahapotehan'ny ala misy ny loharano ipoirany.

Manaitra ny mpitondra fanjakàna hijery akaiky ny asa fampandrosoana any amin'ireo Kaominina ambanivohitra lavitra andriana ihany koa, ny mpitarika ny FIKITAMA. Manan-jo hisitraka ny fampandrosoana mantsy ny tantsaha any amin'ireny toerana ireny hoy Andriamatoa Rakotondrazaka Jean de Dieu, ary tokony hitohy koa ny fitantanan-draharaham-panjakàna. Misy mantsy ny tetik'asa efa vita no tokony efa hamafisina indray ankehitriny.