Ny hoe "velon-dray aman-dreny" dia ireo manana ray sy reny, samy mbola velona na misara-toerana aza. Ara-tantara dia hatramin'ny nanjakan'Andriamanelo, nandalo tamin'ny fitondran'Andriamasinavalona ary hatramin'ny nanjakan'Andrianampoinimerina, no nisy sy nanana ny lanjany ary ny voninahiny ombana hasina ny "velon-dray aman-dreny"...

Satria  mba ho mpisantatra zavatra maro izy ireny sy ho fanatanterahana fomba iray ; ohatra ny fanorenana trano sy ny ady fototra. Ny hevitra azo takarina amin'ny hoe "velon-dray aman-dreny" dia fisantarana, fahazavana, fahavanonana, fanambinana, fahatsarana. Misy isa arahina rehefa mampandray anjara ny "velon-dray aman-dreny", dia olona miisa fito ampitomboina roa, na fito na dimy, izay midika ho isa fahafenoana, firindram-piainana. Raha tsy feno fa mandringa ny fananana ireo ray sy reny, na maty ny iray dia io ilay atao hoe "velomiafy", ireto farany dia afaka misanta-javatra raha tena tsy misy intsony ny velon-dray aman-dreny.