Nitondra fampivoarana teny amin'ny tontolo ambanivohitra tamin 'ny alalan'ny fampitana ny teknikam-pamokarana samihafa ny fikambanana Fambolena sy Teknolojia any Ambanivohitra na ny FTA. Nampivoatra sy nampiova ny fomba fijeren'ny tantsaha momba ny famokarana ny haitao naparitak'izy ireo...

Mivoatra manaraka ny fandrosoana misy ny haitao ampitàna fahalalana ny tantsaha. Mila mivoatra manaraka ny fandrosoana mantsy ny fampitana ny teknikam-pamokarana ho an'ny mpamokatra. Manamora ny fampitàna hevitra sy teknika vaovao momba ny famokarana eny ambanivohitra ny fampiasana ny teknolojian'ny fifandraisana sy ny fampitam-baovao. lsan'ny mampiasa izany ny Fikambanana Fambolena sy Teknolojia any Ambanivohitra na ny FTA.

Amin'ny alalan'ny fiarabe « Agri bus » no anatanterahana izany. Tsy mametraka olana ny fitaovana ampiasaina, ny toerana anaovana fampiofanana ary ny herinaratra ampiasaina. Maro no tombotsoa azo hoy Andriamatoa RATSIMANDRESY Fidèle, teknisiana.

Mitantana tetik'asa antsoina hoe : FM3A na ny Fiarahamonina Maintso Manana ny Amby Ampy sy Afaka manampy ny tantsaha amin'ny Fambolena sy ny Fiompiana ny FTA vatsianny mpamatsy vola avy any Suisse. Mampiavaka ny tetik'asa ny famokarana mikajy ny tontolo ianana mamokatra amin'ny alalan'ny tsy fampiasana taharo simika na amin'ny fambolena na amin'ny fiompiana, Miasa amin'ny faritra enina dia Alaotra Mangoro, Analamanga, Vakinakaratra, Itasy, Amoron'i Mania ary Matsiatra ambony. Mampita ny haitao teknika amin'ny alalan'ny fampiofanana hoan'ny tantsaha mpikambana ny FM3A.