Nisedra olana mafimafy indray ny mpamokatra ronono nandritra ny fikatonan'ny faritra samihafa tamin'ity taona ity noho ny fampiharana ny fepetra tsy iparitahan'ny valan'aretina. Manomboka mivaha kosa izany amin'izao fotoana isokafan'ny faritra izao... 

Tsy afaka nivarotra araka ny tokony ho izy ny ronono novokariny ny tantsaha. Tsy vitsy izy ireo no nanary ny ronono tsy lafo rehefa tsy afaka namadika izany ho vokatra hafa hoy ny filoha nasiônalin'ny Malagasy Dairy Board na ny MDB, Razafindraibe Haingotiana.

Niteraka fahasahiranana tamin'ny fikarakarana ny fiompiana ny tsy fahampian'ny vola niditra satria nisy akony tamin'ny sakafon'omby izany, toa ny tsy fahampian'ny fambolena vilona, ny olana amin'ny fitahirizana ny ronono. Ny teto Analamanga sy ny tany Vakinankaratra no isan'ny nisedra olana, indrindra ny tany Vakinankaratra, fa tsy toa izany kosa ny faritra hafa.

Efa miverina tsikelikely ankehitriny ny fiharian'ny tantsaha mpamokatra ronono taorian'ny fisokafan'ny faritra teto amintsika, saingy ny kalitao no mametraka olana hoy ny filohan'ny MDB. Niverina indray mantsy ny baranahiny amin'y tsy fanajana fenitra ka anentanana ny tantsaha hitandro izany. Ny mpanodina ny vokatra toa ny fanamboarana frômazy, no misedra olana amin'izay tsy fahampian'ny kalitao eo amin'ny ronono vokarina izay hoy Andriamatoa Razafindraibe Haingotiana.