Zoma 4 marsa 2022 — Zoma manaraka ny lavenona — Mibebaha ianareo, hoy ny Tompo, fa efa akaiky ny Fanjakan’Andriamanitra — Evanjely Masina nosoratan'i Masindahy Matio 9, 14-15

Henontsika eto fa miresaka mahakasika fifadian-kanina amin’i Jesoa ireto mpianatr’i Joany : "manino ny mpiantrao no tsy mifady hanina matetika tahaka anay sy ny Farisianina". Mazava ny tenin’i Jesoa fa tsy tokony hifady hanina izy ireo raha mbola miaraka amin’izy ireo izy. I Jesoa mbola eo anivon’izy ireo. Midika izany fa tokony mbola tsy hisaona aloha ny mpianatra, mbola eo amin’izy ireo ny mpampakatra dia i Kristy : noho izany fotoana fifaliana, fety, fiombonana.

Mitohy ny fampianaran’i Kristy : "fa mbola ho avy ny andro hanesorana ny mpampakatra hiala aminy, ka amin’izay vao mifady hanina izy". Ho vonoina i Kristy ary hitsangan-ko velona ary mbola ho avy amim-boninahitra. Ka eo ampiandrasana izay fiverenany izay dia ilaina ny mifady hanina mba hahatsiaro mandrakariva ny fihaonana aminy. Ny tanjona amin’ny fifadian-kanina mantsy dia entina hanampy antsika hiala amin’ny fifikirana amin’ny zavatry ny tany, izay madalo ihany, fa hifikitra amin’Andriamanitra na hahatsiaro azy, mba hanana fiombonana feno amin’i Kristy, eo am-piandrasana ny fiverenany.

Koa eto i Jesoa dia tsy mankahala ny fombafomba mahakasika ny fifadian-kanina matetika tahaka ny nataon’ireto mpianatr’i Joany fa te hisarika ny saintsika fa ny fifadian-kanina dia manana lanjany lehibe : manampy antsika hiombona amin’i Kristy, ary koa hahafahantsika manampy ny hafa. Ny fanontanina mipetraka amintsika kristianina tsirairy avy dia ny hoe : misy lanjany eo amin’ny fiombonanao amin’ny Andriamanitra sy ny hafa ve fifadian-kanina ataonao ? Mangataha àry ny fahasoavan’Andriamanitra mba hampitombo ny fitiavantsika azy, ary ny fifehezan-tena izay ataontsika mandritra izao vanim-potoana karemy izao anie mba hitondra vokatra amin’ny fanahintsika.