Alarobia 27 jolay 2022 — Herinandro fahafito ambin'ny folo mandavantaona — Alao tampina ny masoko, ry Tompo, hibanjina ny zava-mahagaga amin’ny lalànao — Evanjely Masina nosoratan'i Masindahy Matio 13, 44-46

Ry kristianina havana, samy milaza ny Fanjakan’ny lanitra ireto fanoharana roa ireto, Fanjakan’ny lanitra izay sarobidy indrindra, tsy misy tahaka azy, ambony lavitra noho ny zavatra rehetra. Ka na inona na inona heverina ho zava-tsoa ananana, dia afoy izany, rehefa ny Fanjakan’ny lanitra no resaka. I Masindahy Paoly ao Fil 3, 4-9 dia manambara mihitsy fa nanana izay nitokiany toy ny fahaizany, ny hareny, ny finoana maha jody mafana fo azy fa nataoko fakofako ny zavatra rehetra, hoy izy, oharina amin’ny fahalalana an’i Jesoa Kristy. Safidy fototra ny ho kristianina fa sady fiainana eto an-tany no antoky ny mandrakizay.

Voajanahary amin’ny olombelona ny hoe mitady ny tsara hatrany. Ka na inona eo an-tanana dia afoy izay tsara hahazoana ny tsara kokoa. Tsy filana tombon-tsoa akory ny fivavahana fa fisehoan’ilay hetaheta an’Andriamanitra izany. Fampianaran’ny Ntaolo Malagasy rahateo ny hoe tsy miaraka azo ny fandriana mafana sy ny valala manatody. Safidy fototra ny dikan’izany : na Andriamanitra na zavtra hafa. Tsy faty antoka ny fandaozana ny zavatra rehetra noho i Jesoa Kristy, fa mahazo zato heny eto an-tany ary ny mandrakizay any an-koatra. Ho mafy orina anie ny safidintsika hahafoy ny zavatra rehetra ho an’i Kristy. Amen.