Alatsinainy 15 aogositra 2022 — Ny nampakarana an'i Masina Maria any an-danitra — Nampiakarina any an-danitra i Maria, ka mifaly ny tafiky ny Anjely — Evanjely Masina nsoratan'i Masindahy Lioka 1, 39-56

Mankalaza ny nampakarana an’i Masina any an-danitra ny Fiangonana anio ka ny Evanjelin’i Masindahy Lioka mahakasika ny famangian’i Masina Maria an’i Elizabeta no sakafom-panahintsika anio.

Mampahatsiahy antsika ny lanjan’ny famangiana havana, tapaka sy namana ny Evanjely anio. Fombantsika Malagasy ny mifamangy ka tsy diso anjara amin’izany isika kristianina. Indrisy anefa fa mitady ho latsa-danja izany ankeihitriny noho ny fisondrotan’ny vidim-pianana sy noho ny fisian’ity valan’aretina Covid-19 ity. Naneho ny fahavononany i Masina Maria ary naneho fitiavana araka ny lazain’ny ohabolan-drazantsika hoe : "Izay mahavangivangy tian-kavana".

Matetika mitondra voan-dàlana ny mpamangy, mitondra ny tsirambin’ny tànana. I Masina Maria kosa, nitondra an’i Jesoa, nitondra ilay Vaovao Mahafaly izay hiteraka hafaliana ho an’i Elizabeta sy i Joany Batista mbola ao am-bohoka. Asaina noho izany isika mba hitondra an’i Kristy na aiza na aiza toerana, na iza na iza olona vangiantsika. Enga anie ka tsy hohadinointsika i Jesoa Kristy amin’ireo voan-dàlana vimbinintsika ho an’ny tapaka sy namana ary ny havana vangiantsika manomboka izao.

Tsy vitan’ny hoe nitondra an’i Jesoa ihany i Masina Maria fa niantsa ho an’Andriamanitra, izany hoe naneho tamin’ireto olona novangiany ny fankasitrahany, amim-panetren-tena, ny halehibe sy ny hatsarampon’Andriamanitra.