Alarobia 18 janoary 2023 — Herinandro Tsotra faharoa Mandavantaona — Taona tsy ankasa — Velomy araka ny hatsaram-ponao aho, mba hitandremako ny Fanambarana avy amin’ny vavanao — Evanjely Masina nosoratan'i Masindahy Marka 3, 1-6

Fifamaliana nisy teo amin’i Jesoa sy ny Farisianina no resahan’ny Evanjely eto. Fifamaliana mahakasika ny lalàn’ny fialan-tsasatra amin’ny andro sabata. Manaitra manokana ny fanontanian’i Jesoa Kristy hoe : azo atao ve ny manao soa amin’ny andro sabata sa ny manao ratsy ? Azo atao ve ny mamela olona iray ho faty sa ny mamelona azy amin’ny andro sabata ?

Manaitra satria mampametra-panontaniana antsika ihany koa amin’ny fampiasana io andro io ankehitriny : andro fimamoana araka izay tratra sy fidorohana zava-mahadomelina isan-karazany ; andro fandehanana mafy be amin’ny fiara na moto ve io andro io sa andro ialana sasatra hanovozana hery vaovao sy hakana aina misimisy kokoa. Andro hiadivana amin’ny ao an-tokantrano ve sa andro hanatsarana ny fifandraisan’ny mpianakavy ?

Manasa antsika hisafidy ireo fanontaniana ireo na homba an’i Jesoa Kristy, izay tsy mitsahatra ny manao soa hatrany sa hiaraka amin’ny vondron’ireo Farisianina izay nitady ny hisambotra sy hamono an’i Jesoa mihitsy aza, araka ny voalazan’ny Evanjely novakina tamintsika farany teo.