Talata 28 janoary 2020 — Herinandro fahatelo mandavantaona — Evanjely Masina nosoratan'i Masindahy Marka 3, 31-35 — Sambatra ireo mitana ny tenin'Andriamanitra amin'ny fo tsara sy mahitsy, ka mitandrina azy sy mamoa amin'ny faharetana.

Ity ampahan'ny Evanjely nosoratan'i Masindahy Marka ity dia tsy azo raisina ara-bakiteny na hanina amam-bolony ka entina hilazana fa manan-drahalahy i Jesoa. Marina fa niteny ilay olona hoe: "Ao ny reninao sy ny rahalahinao mitady anao". Olona mpiara-monina aminy tokoa io satria mahafantatra ireo lazaina ho rahalahiny, mahafantatra azy satria tonga nanatona azy ihany koa. Fanontaniana no navalin'i Jesoa azy, "Iza mo no reniko sy rahalahiko?" Izy Jesoa ihany no namaly izany rehetra izany, fa izay manao ny sitrapon'ny Rainy no rahalahiny sy anabaviny ary reniny.

Asandratr'i Jesoa mitovy hasina aminy izay manao ny sitrapon'Andriamanitra ka raisiny ho mitovy aminy tanteraka. Ohatra ho antsika eto ny Renin'i Jesoa, ka nampivolana azy nanao io fanambarana lehibe io. Nasandrany ho ambony ny Reniny, indroa Reniny, nefa i Maria ihany io. Reny nitondra am-bohoka azy, ka tonga nofo tao amin'i Maria ny Teny. Reniny, ambonin'izay satria i Maria no làlan'ny sitrapon'Andriamanitra. Nivelona sy nanatanteraka ny sitrapon'Andriamanitra tokoa izy araka ny teniny: "Aoka ho tanteraka amiko araka ny teninao".

Sarotra ho antsika olombelona ny hanao ny sitrapon'Andriamanitra raha tsy mivelona ny fanetren-tena isika. Modely ho antsika, ary ohatra alain-tahaka ny Renin'i Jesoa eto. Samia àry miezaka ny fandavan-tena sy ny fanetren-tena.