Alarobia 4 mey 2022 — Herinandro fahatelo fankalazana ny Paka — Nitsangan-ko velona i Kristy, ka tsy maty intsony; tsy manan-kery aminy intsony ny fahafatesana — Evanjely Masina nosoratan'i Masindahy Joany 6, 35-40

[auido src="/images/sounds/evj-20220504.mp3" background="#0099ffff"]

I Jesoa ilay mofon’ny fiainana, atonintsika mba ahazahoana ny fiainana araka an’Andriamanitra. Misy mahita azy nefa tsy mino, fa tsy afaka ny hino azy manko izay tsy miditra amin’ny Eokaristia, amin’ny fanekena fa fanomezan’ny Ray avokoa ny zavatra rehetra.

Ny fiombonana amin’ny zanaka no ahafahantsika mitia ka miditra amin’ny fiainana izay tsy ho levona mandrakizay. Ny fahitantsika ny fitiavan’ny Ray ao amin’ny zanaka no finoana azy, ka ahafahantsika miara-maty raha ny amin’ny fahotana ary hiara-mitsangana amin’i Kristy maty fa nitsangan-ko velona kosa.

Izay mahita fa ao amin’i Kristy maty, nahafoy ny ainy no afaka higoka ny hasambarana rahatrizay ; entina milaza fa ny fitiavana fa tsy herisetra no lalana mitondra amin’ny fiadanana ary ny fikatsahana izany fiadanana sy fandriampahalemana izany no hasambaran’ny zanak’Andriamanitra. Hoy indrindra mantsy i Masindahy Augustin hoe : noharianao izahay ry Andriamanitra mba ho anao ka tsy hitony ny hetahetam-ponay raha tsy ao aminao. Tsy ho diso anjara amin’ny fitiavan’Andriamanitra anie isika tsirairay avy mino ny fitsanganan’i Kristy ho velona.