Alatsinainy 16 mey 2022 — Herinandro fahadimy fankalazana ny Paka — Raha niara-nitsangana tamin’i Kristy ianareo, dia ny zavatra any ambony, amin’izay itoeran’i Kristy eo ankavanan’Andriamanitra, no katsaho — Evanjely Masina nosoratan'i Masindahy Joany 14, 21-26

Ambaran’i Kristy amintsika fa izay mitandrina didiny no manana fitiavana azy sy ilay naniraka azy. Mazava eto fa ampy hanehoantsika fitiavana an’i Jesoa ny fiainana ny didiny. Rehefa tia an’i Jesoa dia lasa mitovy faniriana aminy, miaina ny sitrapony. Ny fitandremana ny teniny dia midika hoe mitoetra ao aminy isika.

Ary eo am-apanarahan-dia azy izay isika no nampanantenaina ny Fanahy Masina izay mampianatra antsika ny zavatra rehetra. Ka matoky izany fampanantenan’i Kristy izany ve isika ? Indrindra rehefa ao anatiny fahasarotana, mba mangataka ny fanilovan’ny Fanahy Masina ve isika ? Ilaina tokoa ny matoky sy mandray ny fanomezan’ny Fanahy Masina, izay fanomezana lehibe nomena antsika zanany. Koa raha tojo fotoan-tsarotra ara-pinoana dia mazotoa mangataka ny fanilovany sy ny toroheviny. Mazava mantsy ny fampianaran’i Kristy, fa io Fanahy Masina io no hanala ny tahotra sy ny fisalasalana ao amintsika ary hanafy antsika hery vaovao hahafahana miady amin’ny ratsy. Koa mba hahafahantsika mivelona tanteraka ny fampianaran’i Kristy àry, dia mazotoa mangataka mandrakariva ny fanilovan’ny Fanahy Masina.