Sabotsy 23 jolay 2022 — Herinandro fahenina ambin'ny folo mandavantaona — Raiso amim-pahalemem-panahy ny teny voafafy aminareo, izay mahavonjy ny fanahinareo — Evanjely Masina nosoratan'i Masindahy Matio 13, 24-30

Ny mpamboly dia mahatsapa mandrakariva fa tsy misy tanim-boly ka tsy hanirian’ny ahi-dratsy hatramin’izay ka hatramin’izao. Lasa ny saintsika fa avy aiza ny ratsy, ary nahoana no toa mahomby kokoa ny mpanao ratsy noho izay mitandrina ny lalàna. Mandra-pahatongan’ny voam-bary dia tsy voahavaka ny vary sy ny tsiparifary, ny voany no ahalalana ny hazo, hoy i Jesoa, kanefa koa hoy izy hoe avelao hiara-maniry, hiara-mitoetra eo izy roa ambara-piavin’ny fijinjana.

Ny ohatra noraisin’i Jesoa izao no manambara amintsika fa tsy zavatra ivelan’ny fiainantsika ny ratsy fa mahazo faka ao am-po aza sy eo amin’ny seha-piainan’ny mpiara-belona. Tsy ny hanesorana azy anefa no iantsoan’i Jesoa antsika, raràny aza izany, fa ny hananana faharetana sy haneho ny tena maha kristianina antsika hiavaka amin’ny ratsy.

Tsy Andriamanitra no mamafy ny ratsy fa ny fahavalo kanefa manentana izay rehetra mino izy mba hanana faharetana satria amin’ny fotoana fijinjana dia ny voa tsara ihany no hangonina any an-tsompitra. Tadidio koa anefa fa tsy valin’ny hatsaram-panahintsika ny fahasoavan’Andriamanitra fa setrin’ny fitiavan’Andriamanitra maimaim-poana. Koa herezo àry, aza manaiky ho resin’ny ratsy, hoy i Masindahy Paoly, fa reseo amin’ny soa ny ratsy (Rm 12, 21). Amen.