Zoma 29 jolay 2022 — Herinandro fahafito ambin'ny folo mandavantaona — Mitenena Tompo ô, fa mihaino ny mpanomponao: Ianao no manana ny teny mahavelona mandrakizay — Evanjely Masina nosoratan'i Masindahy Matio 13, 54-58

Tantarain’ny Evanjely anio ny farany nandehanan’i Jesoa tao Nazareta tananany. Nolavin’ny olona Izy satria tsy araka izay niheveran’ny olona azy. Ny Mesia nandrasan’ny olona manko dia mpajaka mahery, be voninahitra, otronina tafika tsy hay resena ; fa i Jesoa kosa zanaky ny mpandrafitra, tsotra, irery na otronina mpianatra vitsivitsy, tsy manaitra. Tapaka avy hatrany ny fifandraisana matetika rehefa ny fitsarana no mandeha alon’ny resaka. Rehefa ilay fetran’ny olona no hita sy fantatra mialoha dia tsy mihaino intsony satria toa tsy maharesy lahatra na ny fahalalana azy ivelany aza. Dia izany no nanjo an’i Jesoa tao an-tanànany : tsisy nihaino, tsy ninoan’ny olona ; ny mpaminany tsy masina an-taniny.

Tafintohina tamin’i Jesoa ny olona tao Nazareta. Rehefa mifanena amin’i Jesoa dia miharihary ny fahotan’ny olombelona ; miseho miaraka amin’izay koa ny safidin’ny olombelona sy ny fitsarana. Izay mibebaka ka manatona an’i Jesoa Kristy dia voavonjy ; izay miziriziry kosa dia hanana ny anjarany.

Tsy afaka nanao fahagagana i Jesoa noho ny tsy finoan’ny olona. Ny finoana manko no mahatanteraka ny fahagagana. Ankoatra izany dia izao hoe tsy afaka manao na inona na inona Andriamanitra rehefa tsy mino ny olona, rehefa tsy mangetaheta ny olona. Hangetaheta lalandava an’Andriamanitra anie isika, hisehoan’ny voninahiny. Amen.