Talata 2 aogositra 2022 — Herinandro fahavalo ambin'ny folo mandavantaona — Ampahafantaro ny lalan’ny lahatrao aho, mba hisaintsainako ny asanao mahagaga — Evanjely Masina nosoratan'i Masindahy Matio 14, 22-36

Efa ela ireto mpianatr’i Jesoa no nanaraka Azy isan’andro, nefa mbola hita eto ny tsy fahatokisan’izy ireo Azy tanteraka, ary mbola nisalasala rehefa nahita an’i Jesoa nandeha teny ambony ranomasina. Na dia nanome toky azy ireo àry, i Jesoa : "matokia, fa izaho ihany aza matohotra", dia mbola be ahiahy ihany, hita taratra tamin’ny valintenin’i Piera izany : "raha ianao àry Tompo, asaovy hankeny aminao eny ambony rano aho." Nefa rehefa tao anatin’ny tena fahasarotana izy dia niantso mafy an’i Jesoa hoe : "Tompo ô, vonjeo aho".

Mila fanampiana avy amin’i Jesoa mandrakariva ny fiainanao, ny fiainako. Maro ireo fakam-panahy mampanahirana antsika ny miady aminy, toy ny rivotra manosika hianjera. Aza misalasala isika miantso ny fanampian’i Kristy, tahaka ny nataon’i Piera: "Tompo ô, vonjeo aho". Mba hahafahantsika miady sy mandresy ao anatin’ireo karazana fakam-panahy mety hampilentika antsika any amin’ny fahaverezana dia matokia Azy mandrakariva, miombona Aminy, izay miombona aminy no handresy sy ho voavonjy eo amin’ny fiainana. Tsy miady irery isika fa eo mandrakariva Izy rehefa miombona Aminy ao anatin’ny vavaka isika. Vonjin’izay mitoky Aminy ny Tompo.