Zoma 14 ôktôbra 2022 — Herinandro Tsotra favalo amby roapolo Mandavantaona — Mamirapiratra tahaka ny fahazavana amin’izao tontolo izao ianao, satria mitana ny tenin’ny fiainana — Evanjely Masina nosoratan'i Masindahy Lioka 12, 1-7
Ry kristianina havana ; rahefa avy nifanazava tamin’ireo manam-pahefana Jody i Jesoa dia mitodika mankahery ireo mpianany. Ny fitondran-tena tokony hananana no anombohany izany. Tandremo ny fihatsaram-belatsihy, hoy Izy : miseho ho tsara sy masina eto ivelany kanefa tsy izany ao anaty. Mamita-tena ihany izay mihatsaravelatsihy satria ny marina tsy mba maty. Aoka ho marina amin’ny tena.
Ny fankaherezana faharoa dia hoe ataovy antso avo ny fampianaran’i Jesoa ho ren’ny rehetra dia hiharihary ho azy eo izay fihatsaram-belatsihy ; satria ny marina toy ny afo, hoy ny fitenenana, ka izay mikobona azy ny ho may.
Ny fankaherezana fahatelo dia hoe Andriamanitra ihany no atahory satria izy irery no afaka mamery ny fanahy amam-batana any amin’ny afobe. Tsy tokony hatahotra ny olombelona satria samy mbola hotsaraina aza. Mamelombelona ery ny tenin’i Jesoa hoe "izao no lazaiko aminareo sakaizako", izany hoe manaiky hiray aina amintsika izy, tsy mamela ho irery, tsy mandao, sakaiza mahatoky, tongotra miara-mamindra sy fo miara-mitempo. Fa ny tena lehibe dia ny hoe mahatoky Andriamanitra niantso antsika ; azo antoka ny teniny hoe tsy avelany hisy ho very na dia iray aza, efa voaisany hatramin’ny singam-bolo ary efa vita tombonkavatsa eo an-tanany sy efa voasoratra anarana any an-danitra. Amen.
