Talata 15 nôvambra 2022 — Herinandro Tsotra fahatelo amby telopolo Mandavantaona — Ny teninao, ry Tompo, no fahamarinana. Ankamasino amin’ny fahamarinana izahay — Evanjely Masina nosoratan'i Masindahy Lioka 19, 1-10

Tantara tsy zoviana amintsika ity tantaran'i Zake nambara teo ity, tantara manoro sy mampahatsiahy ny zava-dehibe sy ambony indrindra tokony ho katsahina eo amin’ny fiainana sy ny fomba enti-mikatsaka azy. Fa na dia tao anatin’ny asa sy ny harena aza i Zake, dia nahatsapa fa misy banga ny fiainany, misy mampangetaheta azy mandrakariva, tsy iza akory izany fa i Jesoa, Andriamanitra tonga eo anivontsika, Andriamanitra tonga hamonjy antsika.

Henontsika teo fa i Jesoa niantrano tao aminy no nameno ny hafaliany, nahasafononoka ny fahasambarany. Mampadinika anstika eto amin’ity fiainana ity hoe : inona no katsahintsika voalohany, omentsika lanja ? Ka tadiavintsika amin’ny fomba rehetra. Toy nataon'i Zake ? Ary rahefa tafahaona amin'i Jesoa isika, mahatsapa ny fitiavany ve ? Ka hiova famindra, tsy hijery ny tena samirery fa hiezaka hanasoa ny hafa ? Diniho i Zake : ilay fatra mpametsifetsy, mpanambaka, mpanararaotra sy iray tsikombakomba amin’ny ratsy, nanjary mapanao soa ny mahantra. Nanomboka fiainam-baovao, feno fitiavana an’Andriamanitra, ilay fototry ny tena fahasambarana sy fitiavana ny mahantra.

Aza variana amin’ny fitadiavana sy ny fiainana fotsiny e! fa katsaho Andriamanitra. Ary aza manary tena amin’ny zava-mandalo, toy ny vola sy harena fa mpandova an’Andriamanitra isika nandray ny finoana. Ary asio akony eo amin’ny hafa sy ny manodidina ny fitiavan’Andriamanitra antsika.