Alakamisy 1 desambra 2022 — Herinandro voalohany amin'ny Fiavian'ny Tompo — Taona A — Indro ho avy ny Tompo hanavotra ny vahoakany; sambatra izay vonona hitsena Azy — Evanjely Masina nosoratan'i Masindahy Matio 7, 21. 24-27

Ry kristianina havana ! Tamin’ny katesizy ho an’ny fianakaviana tamin’ny herinandro dia nisy fampianarana ho antsika milaza hoe ny sakramenta dia “engagement” handraisan’ny olona an-tanana ny fahalalana ny misterin’Andriamanitra. Miditra lalindalina kokoa amin’ny fiainantsika ny maha kristianina antsika isika amin’izany fa tsy mijanona fotsiny amin’ny hoe vita batemy dia tonga zanak’Andriamanitra. Izany indrindra no hamafisin’i Jesoa amin’ny Evanjely nohenointsika teo milaza fa tsy ampy ny sentosentom-po miantso fotsiny hoe “Tompoko, Tompoko” dia ho azo antoka fa hiditra any amin’ny fiainana ianao. Hoy Itompokolahy Mmopera Navone, pretra Zezoita hoe “ny vavaka tolona fa tsy sento” ary misy foto-kevitra indray alahady izay hanentanan’ny Eglizy antsika manao “tolona ambony vatolampy ny fiainantsika kristianina ka izay manao taha-tsy vinitra no vaky loha”. Midika izany fa tsy mamela antsika hipetrapetraka ny Tenin’Andriamanitra mahatonga antsika hino fa mitaky ezaka maro amintsika.

Izay no nahatonga an’i Jesoa hanao fanoharana mahakasika ny lehilahy hendry sy ny lehilahy adala manorina trano. Ny fifotorantsika amin’ny Tenin’Andriamanitra no hisarihany ny saintsika sy ny fo amam-panahintsika amin’io fanoharana io. Efa tamin’ity herinandro ity i Jesoa no voalaza fa nentanin’ny Fanahy Masina ka nanandratra vavaka milaza fa nafenin’Andriamanitra tamin’ny hendry sy ny be saina ny tsiambaratelon’ny fanjakany fa nambarany tamin’ny madinika sy ny tso-po kosa. Iza marina àry izany no tena olon-kendry fa eto izy amin’ny fanoharana ataony indray dia milaza fa ny lehilahy hendry dia toy ny manorina trano ambony vatolampy raha mampifototra ny fiainany amin’ny Tenin’Andriamanitra. Velona sy mahery ny Tenin’Andriamanitra ka ny finoana ivelomantsika ny maha kristianina antsika isan’andro dia io Tenin’Andriamanitra io no manamafy azy. Tsy ampy noho izany ny mihaino na mamaky fotsiny ny Tenin’Andriamanitra fa tsy maintsy hiainantsika ary ampiharintsika amin’ny fiainana Izy ka hampanjakantsika ny fitiavana izay efa nafafin’i Kristy mitondra fiadanana ho an’izao tontolo izao. Eo anatrehan’izany na inona na inona zava-misy na rivotra mitsoka aterak’izao fiainana izao dia tsy hampiontsona ny finoantsika izany satria miorim-paka amin'ny Tenin’Andriamanitra isika ka tsy voarebirebin’ny firehen-kevitra maro samihafa mandiso lalana antsika. Aoka àry ny ezaka rehetra ataontsika mba hody ventiny eo amin’ny fiainantsika ka hampanjary ho nofo ny Tenin’Andriamanitra amintsika tsy ho ravan’izay mety tafio-drivotra afafin’izao fiainana izao.

Jesoa Tompo ô ! Sarotra ny manana ny fahendrena tadiavin’ny Evanjely ary raha tsy Ianao sy ny Teninao mamelona anay isan’andro dia zava-poana ny ezaka sy ny vavaka ataonay miantso ny anaranao, koa ampio izahay hanorina ny fiainanay amin’ny Teninao ! Amen.

[Miara-dàlana] Zoma 17 mey 2024

♦ Nankahery an'i Mgr Jean Claude Rakotoarisoa amin'ny fanohizana ny asa fitoriana nataon'ireo Eveka nodiambiasany ny Fivondronamben'ny Eveka eto Madagasikara sy ny Solontenan'ny Ray masina eto Madagasikara... ♦ Manentana ny Eglizy rehetra eto Madagasikara hanamarika ny Andro Maneran-tany ho an'ny Ankizy, ny 25 sy 26 mey 2024, ny Vovonam-Pirenena Katôlikan'ny Ankizy eto Madagasikara... ♦ Nanao antso avo amin'ny tsara sitrapo rehetra ny Papa François, mba hanampy ireo vahoaka ao Afghanistan, izay niharan'ny tondra-drano...

Tohiny...

Famantarana ny fitiavan'Andriamanitra antsika ny Noely

Noho ny fetin'ny Noely, Fankalazana manetriketrika ny nahaterahan'i Kristy Mpamonjy an'izao tontolo izao, dia manafatra ary miray soa ho antsika i Mompera Bizimana Innocent, Lehiben'ny Salezianin'i Don Bosco eto Madagasikara sy ny Nosy Maorisy.

Tohiny...

Zatti, rahalahinay

Ny horonan-tsary "Zatti, notre frère" (Argentina, 2020) dia manoritsoritra ireo vanim-potoana tena sarotra teo amin'ny fiainany. Tao Viedma no nitranga ny tantara tamin'ny taona 1941 : 60 taona i Zatti ary noterena handao ilay toeram-pitsaboana izay nikatrohany amam-polo taonany maro. Fitsapana mivaivay ho an'ny finoany sy ny herim-pony izany.

Tohiny...