Zoma 6 janoary 2023 — Mialoha ny Nisehoan'ny Tompo — Ary ny Teny dia tonga nofo, ka nonina taty amintsika. Izay rehetra nandray Azy dia nomeny fahazoana ho tonga Zanak’Andriamanitra — Evanjely Masina nosoratan'i Masindahy Marka 1, 6b-11

“Ianao no zanako malalako, ianao no ankasitrahako”. Injay ilay feon’Andriamanitra re avy any an-danitra nandritra nidinan’ny Fanahy Masina tamin’i Jesoa, rehefa nandray ny Batemin’i Joany. Izany tokoa no porofo nentin’Andriamanitra nanambarany amintsika fa zanaka malalan’Andriamanitra i Jesoa. Ary nomen’ny Rainy azy ny Fanahy Masina mba entiny hanatanterahany asam-pamonjena izao tontolo izao.

Isika ihany koa, nandray ny Fanahy Masina tamin’ny Batemy, ka nahatonga antsika ho zanaka malalan’Andriamanitra ihany koa. Vokatr’izany fahasoavan’ny Batemy izany dia afaka miady amin’ny fahotana isika. Ary miady amin’ny fahotana mandrakariva mba tsy hanary ilay fahasoavana noraisany tamin’Andriamnitra. Manasa antsika àry, mba hampita amin’ny hafa manodidina antsika ny asan’ny Fanahy Masina amin’ny alalan’ny fiainantsika azy.

Koa angatao mandrakariva àry, ny herin’ny Fanahy Masina, izay aina mamelona antsika sy mpanazava ny fiainantsika mba hanentana ny fo amam-panahitsika eo am-panarahan-dia an’i Kristy, ka ho vonona hiaina izay ambarany amintsika.