Alakamisy 19 janoary 2023 — Herinandro Tsotra faharoa Mandavantaona — Taona tsy ankasa — Araikao amin’ny fanambarànao ny foko ry Tompo, ary ny lalanao no aoka hanenika ahy — Evanjely Masina nosoratan'i Masindahy Marka 3, 7-12

Manambara ny endrik’Andriamanitra fitiavana, ny asa sy fihetsika ary teny ataon’i Jesoa, araka ny lazain’ny Evanjely anio : manasitrany ny rofy rehetra Izy eto, izany hoe tiany mba ho afaka amin’ny ratsy rehetra isika olombelona ; naka sambokely izy hitanila mba hahafahany mampita ny hafatr’Andriamanitra amin’iretsy olona marobe tonga nanatona Azy sy hahitan’izy ireo Azy bebe kokoa.

Mbola tsy lavorary tanteraka anefa izany fitiavan’Andriamanitra izany satria mila mandalo fijaliana sy fahafatesana Izy. Izany indrindra no nandraràny ireo demony noroahiny, sao Mesia tapany no azon’olona fa tsy ilay Mesia vonona ny hitondra hatramin’ny farany ny hazofijaliana ho famonjena antsika olombelona mpanota.

Asaina isika kristianina, haka tahaka an’i Jesoa, manao soa hatraiza hatraiza, fa izany no hahafantaran’izao tontolo izao fa fitiavana Andriamanitra. Asaina ihany koa isika hahay hanasitrana ireo karazana ratra sy fery misy ao anatin’ny tokantrano sy fiaraha-monina ary ny Fiangonana misy antsika, fa mila manomboka avy ao any asa soa ataontsika.