9 jolay 2023 — Alahady Tsotra fahefatra ambin'ny folo Mandavantaona — Taona A — Misaotra Anao aho, Raiko, Tompon’ny lanitra sy ny tany, fa nambaranao tamin’ny madinika ny tsiambaratelon’ny Fanjakanao — Evanjely Masina nosoratan’i Masindahy Matio (Mt. 11, 25-30)

Miditra amin’ny herinandro faha-14 ny Eglizy anio. Vavaka fisaorana an’Andriamanitra Rainy no nataon’i Jesoa eto na dia mizara roa ary ireo olona teo am-pandraisana ny hafany. Ao ireo olona izay miavonavona sy miseho mahalala ny zavatra rehetra ka tsy misy tafita ny hafatra izay ambarany, nefa dia ao koa ireo olona tso-po izay naharay tsara ny hafany. Ny fahatsoram-po àry no lalana tian’i Jesoa harahintsika mba hananantsika fahatokisana sy fiankinana tanteraka amin’Andriamanitra. Ny olona tso-po mantsy dia toy ny zaza manana fahadiovam-po, izay tsy manana hianteherana ankoatra ny ray aman dreniny, izay tsy iza fa Andriamanitra. Sarotra tokoa ankehitriny no manana an’izay toetra izay satria dia mitaky fanetren-tena izany.

Manoloana izany àry, dia tsy mitsahatra miantso antsika i Jesoa mba hanara-dia Azy amin’izao fiainana miha sarotra izao, ka maro no hianjadian’ny fahoriana sy ny fijaliana. Izy ihany mantsy no afaka hanamaivana an’izany. “Ento ny jiogako”: ny mitondra ny jiogany mantsy dia midika fa manaraka izay alehany sy manafaka an’izay mangeja antsika. Tsy tiany ho eo ambanin’ny lalàna, izay tsy mampisokatra ny fanahintsika toy ny nahazo ireo Jody tamin’izany, isika fa tiany kosa hanaraka ny lalam-pitiavana izay nosoritany dia ny fitiavana an’Andriamanitra sy ny fitiavana ny namana. Ny jiogany dia entina ao anatin’ny fitiavana sy ny halemem-panahy.
Ry Jesoa malemy fanahy sy manetry tena ao am-po: ataovy manahaka ny fonao ny fonay.