30 ôktôbra 2023 — Alatsinainy, Herinandro Tsotra fahatelopolo Mandavantaona — Ankalazao ny Tompo, ry Jerosalema, Izy Ilay mandefa ny didiny eto an-tany — Evanjely Masina nosoratan’i Masindahy Lioka (Lk. 13, 10-17)

Ry kristianina havana; mamangy sy manafaka ny vahoakany Andriamanitra. Izany no ventin-kevitr’ity Evanjely anio ity. Raha toa ka voararan’ny lalàna tsy hifampikasokasoka amin’ny vehivavy ny mpampianatra jody, i Jesoa kosa hita nanatona sy nifanosina tamin’ireny sokajin’olona voahilika ireny. Raha voararan’ny lalàna ny manasitra amin’ny andro sabata noho izy andro fitsaharana, i Jesoa kosa dia nanova ny fomba fijery fa ny andron’Andriamanitra dia androm-pamonjena.

Farafahoriana izany tsy mahandrandra ny lanitra akory izany; endriky ny fahoriana sy tandindon’ny fahaverezana manjo ny olombelona. I Jesoa no manao ny dingana voalohany satria Mpamonjy izy. Ny biby aza, hoy izy, karakaraina sy vonjena na dia sabata, tsy mainka ve fa ny olombelona, zanak’i Abrahama, izany hoe isam-bahoakan’Andriamanitra, vahoaka voafidy ka tsy hovonjena. Dia naverin’i Jesoa tamin’ny laoniny sy nasandrany ny fahamendrehan’ity zanak’Andriamanitra.

Tsy hoe fitia te handika ny lalàna fitsaharana amin’ny sabata ny an’i Jesoa fa te hanangana ny fanjakan’Andriamanitra izy dia fanjakan’ny famonjena, na amin’ny fotoana na tsy amin’ny fotoana. Ny famonjena no tanjona. Anasan’i Jesoa antsika sy anirahany antsika izany asa mankadiry izany. Meteza isika ho tanana, tongotra, maso, vava ary fon’Andriamanitra mitia sy mamonjy ny olona. Amen.