6 aprily 2024 — Sabotsy amin'ny Havaloan'ny Paka — Ity no andro nataon’ny Tompo, ka mifalia sy miravoa isika — Evanjely Masina nosoratan’i Masindahy Marka (Mk. 16, 9-15)

Ry havana; efa nolazaintsika teto fa averina ihany hoe nitsangan-ko velona i Jesoa ny marainan’ny andro voalohany amin’ny herinandro, dia midika fa zava-boary vaovao sy tontolo vaovao no tokanana amin’ny nandresen’i Jesoa. Olom-baovao, fiainam-baovao, tontolo vaovao. Mamintina ireo fisehoan’i Jesoa Kristy tafatsangan-ko velona ny Evanjely anio. Fa misongadina koa anefa ny tsy finoan’ny mpianatra ny filazan’ireo nahita. Izany ny olombelona: mitaky porofo sy antoka sy fanazavana lojika; tsy azo terena atao amboletra rahateo ny finoana, tsy manao an-keriny Andriamanitra fa miteny moramora ao am-po sy manaitra ny konsiany.

Farany; nirahan’i Jesoa hitory ny Evanjely izy ireo. Naveriny amin’ny laoniny ny fitokisany azy ireo na dia efa nivadika taminy aza ireo. Nanankinany ny famonjena an’izao tontolo izao. “Mitoria ny Evanjely amin’ny voary rehetra, hoy i Jesoa”: ny voary rehetra mihitsy fa tsy ny olombelona fotsiny, satria asan’Andriamanitra ny voary rehetra sy izao tontolo izao ka voalahatra ho amin’ny famonjena. Ny fitoriana ny Evanjely amin’ny voary rehetra dia ny fikarakarana azy, ny fanajariana azy fa tsy fandringanana, tsy fanjakazakana, tsy fandripahana. Am-pitokisana tanteraka no iantsoan’i Jesoa antsika ary mbola fitokisana lavitra koa no anirahany antsika sy anankinany amintsika ny famonjena miaraka aminy. Hombany fitahiana anie isika hahaleo hahalasana amin’izany. Amen