8 mey 2024 — Alarobia, Herinandro fahenina Fankalazana ny Paka — Natsangan’Andriamanitra ho velona i Kristy, Ilay nahantona tamin’ny Hazofijaliana noho isika — Evanjely Masina nosoratan’i Masindahy Joany (Jo. 16, 12-15)
Anisan’ny hafatra napetrak’i Kristy, mialoha ny hiakarany any amin’ny Rainy, ny anjara toerana sy ny asan’ny Fanahy Masina ao am-pon’ireo Apôstôly sy ireo izay hino sy hanara-dia Azy koa. Ny Fanahy Masina no hanohy ny asa fanambarana nataony sy hampihaina izany ho an’ny ankehitriny. Miandry fotoana ny zavatra, fa izany no fomba namonjen’Andriamanitra an’izao tontolo izao, mandeha araka ny nandaharany azy. “Mbola manana zava-javatra holazaina aminareo Aho, nefa tsy zakanareo ankehitriny”. Izay noraisiny tamin’ny Ray tokoa mantsy no zarainy sy ambarany kanefa tsy zakan’ny mpianatra sy ho azony anatin’ny fotoana fohy. Fa eo ny Fanahy Masina manampy azy ireo amin’izany. Fa ho antsika kosa dia hoe: Ilana fandalinana sy fandinihana mandrakariva ny misterin’Andriamanitra, ary ao anatin’ny finoana, tsilovin’ny Fanahy Masina no ahafahana manao izany. Tsy indray maka eo amin’ny fiainana no hahazoana ny misterim-panavotana fa mila halalinina sy hiainana mandrakariva. Tsy nampanantena fotsiny ny Fanahy Masina i Jesoa, fa nanome antoka hahazoantsika ny marina rehetra, dia ny marina momba Azy, momba ny fampianaranany, momba ny fiainana, ny fahafatesany sy ny fitsanganany ho velona. Izay tsy zava-nisy nandalo fotsiny ho antsika olombelona navotany fa misteri-panavontana ho antsika: ao anatin’izany ny zavatra mbola ho avy; izany hoe: “ny vokatry ny fitsanganany ho velona, ny fizorantsika mankamin’ny fiainana mandrakizay.
Tsy misaraka fa tokana ihany ny asan’i Jesoa sy ny Fanahy Masina nampanantenainy dia ny hisokafan’ny fiainantsika sy hiainanatsika ny misterin’Andriamanitra. Koa anjarantsika ny mandinika isan’andro,miaraka amin’ny Fanahy Masina, ireo tenin’i Kristy, ny fampianarany, ny fijaliany sy ny fahafatesany ary indrindra ny fitsanganany ho velona.
Aza avela handeha ho azy ny fiainana, aza avelo ho entin’ny onjam-piainana sy ny rendrarendra, fa antsoy mandrakariva ny Fanahy Masina, mba hanampy hivoarana lalandava araka an’Andriamanitra.
