Alatsinainy 30 marsa 2020 — Herinadro fahadimy amin'ny Karemy — Evanjely Masina nosoratan'i Masindahy Joany 8, 1-11 — Manantena ny Tompo ny fnahaiko, miandry ny teniny aho ; satria hatsaram-po no ao amin'ny Tompo, ary fanavotana lehibe.
Ry kristianina Havana, rentsika teo fa mandritra ny fampianarana ataon’Jesoa no tonga ireto Farisianina maneho tsy fanajana, satria sady manelingelina ny fampianarana no mandroso olana. Fanampin’izay, mbola maka fanahy. Mazava ho azy fa tapaka ny fampianarana ary natrehana ny olana. Teo anatrehan’izay anefa, tsy nahitana hatezerana na toetra maneho fikizitinana akory teo Aminy. Mampianatra antsika mianakavy sahady izay eto mba hahay hiatrika ny zava-misy eo amin’ny fiainana, fa tsy hoe rehefa tsy mifanaraka ny programantsika dia tezitra na kizitina. Eo amin’ny fiainana mantsy, maro ny zavatra mifamahofaho.
Inona àry ity olana eto ?
Vehivavy tratra nijangajanga no nentina teo Aminy. Raha ny lalàn’ny fiaraha-monina mantsy dia tokony toraham-bato izy, ka ny hevitr’i Jesoa no ilaina sisa. Fa, manoloana ny kotaba sy ny antsoantson’ireto olona dia nangina i Jesoa. Mampianatra antsika izany eto hoe : manoloana ny fihantsiana na fakana fanahy ataon’ny hafa, tsy voatery hiteny fa mangina dia ampy. Ny hany nataony dia niondrika ka nanoratra tamin’ny tany. Rehefa manoratra amin’ny tany mantsy dia vetivety io dia tsy hita toy ny voafafa teo. Koa, raha lalàna manameloka olona no nosoratany teo, vao tonga ny orana na ny rivotra mamafa azy dia tsy hita intsony io. Te hiteny Izy fa ny famindram-po ambony noho ny lalàna na ihany koa hoe ny famindrampon’Andriamanitra dia tanteraka amin’ny alalan’i Jesoa Kristy.
Fa, rehefa nitraka Izy vao niteny hoe : “izay tsy nanota taminareo no aoka hitora-bato azy voalohany”. Tsy nisy sahy nitoraka na iray aza hatramin’ny zokinjokiny izay niala mialoha mihitsy. Mampianatra antsika izay hoe : aza maika mitsara olona na manameloka olona. Jereo mandrakariva ny tenanao ary manaova fandinihan-tena lalina, karemy rahateo ny andro, ka rehefa mahatsiaro fa tsy mendrika mandehana mibebaka. Amin’ny fotoana hibebahantsika dia miteny amintsika i Jesoa hoe : “mandehana ka aza manota intsony”.
