14 desambra 2024 — Sabotsy, Herinandro faharoa amin'ny Fiavian'ny Tompo — Akaiky ny andron’ny Tompo, indro Izy fa ho avy hamonjy antsika — Evanjely Masina nosoratan’i Masindahy Matio (Mt 17, 10-13)

Manasa antsika ho vonona ny handray an’i Jesoa Kristy, Mesia sy Mpamonjy ny Vaovao Mahafaly anio. Mandray ny fandaharam-pamonjen’Andriamanitra mantsy isika rehefa mandray Azy, satria Izy sy ny Ray dia iray ihany ary Izy no irany ho famonjena antsika. Very famonjena noho izany isika raha tsy mahay mandray Azy eo amin’ny fiainantsika. Very famonjena, midika ihany koa hoe, very fahasambarana sy fahasoavana. Fomba maro samihafa no andondonany ny varavaran’ny fontsika: amin’ny alalan’ny Teniny, amin’ny alalan’ireo sakramenta (Eokaristia, Fampihavanana), amin’ny alalan’ireo mahantra tsy misy mpiahy. Angataho àry Izy Tompo, hananantsika masom-panahy hahita azy eo amin’ny hafa ary haheno ny feony miantso antsika mandrakariva amin’ny fahasambarana dieny ety an-tany.