Zoma 12 febroary 2021 — Herinandro fahadimy mandavantaona — Raiso amim-pahalemem-panahy ny teny voafafy aminareo, izay mahavonjy ny fanahinareo — Evanjely Masina nosoratan'i Masindahy Marka 7, 31-37
Ry havana ! Any amoron-dranomasin’ny Galilea indray i Jesoa eto, any amin’ny faritanin’i Dekapôly. Inona ny zava-nisy ? Nitondrana olona iray malemy, moana sy marenina Izy mba hametrahany tanana. Milaza amintsika izany fa misy hasiny ary tsy ataotao foana ity fametrahan-tanana ity, ka tsy ny olon-drehetra no afaka manao izany. Raha izany manko dia tsy nilaina akory ny nanatona an’i Jesoa fa ireo mitondra azy ireo ihany dia ampy hanao ny fametrahan-tanana aminy. Mitandrema àry, ary aoka ho mailo fa tsy ataotao foana ny mametrahan-tanana ary tsy ny olona rehetra no nomena fahefana ny amin’izany.
Ry havana, mangarona ny sofiny i Jesoa ary manisy rora ny lelany ary miteny hoe : Efeta na hoe misokafa. Averin’ny pretra io fihetsika io rehefa misy atao Batemy mba tsy ho sofina donto na ho variana amin’ny feo hafa no ho reny fa ny feon’ilay mpiandry ondry tsara, mba tsy ho teniteny foana, tsaho, lainga sy fitaka, fisolokiana ary teny feno fankahalana no hivoaka amin’io vavany io fa teny soa mahafaly ho an’ny malahelo.
Eto am-pamaranana àry dia miantso an’ireo rehetra vita Batemy mba hampiasa ny sofina sy ny vavany ho voninahitr’Andriamanitra.
