Alatsinainy 8 marsa 2021 — Herinandro fahatelo amin'ny Karemy — Aza manamafy ny fonareo ianareo anio, aoka hihaino ny feon’ny Tompo — Evanjely Masina nosortana'i Masindahy Lioka 4, 24-30

"Tsy misy mpaminany hajaina amin’ny tany nahabe azy", izay no valin-tenin’i Jesoa tamin’ireto mpiara-monina taminy, izay nihevitra Azy tsy ho zanak’Andriamanitra ka tsy niraharaha ny fampianarana nataony. Fijery ivelany, endrika ivelany no nitsarana an’i Jesoa. Mino isika fa i Jesoa dia tena olombelona marina tokoa, niaina toy ny olombelona rehetra, zanaky ny mpandrafitra, fa izany kosa anefa tsy afa-misaraka amin’ny maha Andriamanitra Azy. Saingy ireto mpiara-miaina taminy dia nihevitra fotsiny ny maha olombelona Azy, ka nahatonga azy ireo tsy hihaino ny fampianarana nentiny. Tsy nahasakana ny asa nanirahany Rainy azy anefa izany.

Izao fotoanan’ny karemy izao no fotoana handrefesantsika ihany koa ny halalin’ny fahafantarantsika an’i Kristy, ny halalin’ny finoantsika Azy. Rehefa lalina tahaka ny finoan’i Namàna Sirianina ny finoantsika dia hahita fahasoavana aminy isika. Ny finoan’i Namàna no nahasitrana azy taminy habokany. Koa aoka àry isika, handray an’i Kristy amin’ny tena maha olombelona sy tena maha Andriamanitra Azy tokoa. Ny fahaizana mandray ireo maha izy azy an’i Kristy ireo no hanampy antsika hahatsapa fa i Kristy koa dia niaina toa antsika, niady tamin’ny fakam-panahy ary nandresy noho ny fifandraisany am-po mandrakariva tamin’Andriamanitra Rainy, tamin’ny alalan’ny vavaka.