Ravehivavy, lehibe ny finoanao

Alarobia 05 aogositra 2020 — Herinandro faha-18 mandavantaona — Evanjely Masina nosoratan'i Masindahy Matio 15, 21-28 — Manantena ny Tompo ny fanahiko, miandry ny teniny aho.

Tohiny...

Rehefa nilazan'i Dera an-taratasy ireo ray aman-dreniny fa teraka i Vola, dia niakatra izy mivady, ary niaraka tamin'i Soa sy ny rainy. Tsy afa-pahasahiranana mihitsy i Dera fa nitombo indray aza. Nitohy indray ny fikorontanan-tsaina, saingy tamin'i Vola kosa, dia tsy nisy fiantraikany taminy izany, fa vao mainka nampisehoany ny maha renim-pianakaviana tompon'andraikitra azy.

Rehefa lavitra an'i Vola i Dera dia tsy mahatsiaro ny maha izy azy. Fa rehefa eo akaikiny dia mahatsiaro tena ho mihamatotra sy matoky tena ary manam-pahamendrehana kokoa. Ka na dia teo aza ny fikorontanan-tsaina tamin'ny nandalovan'i Soa tao an-trano tamin'ny fotoana naha tany amin'ny hopitaly an'i Vola, dia mba naneho ny maha izy azy i Dera rehefa tonga tao an-trano niaraka tamin'i Vola sy ny zazakely.

Naneho fahasarota-piaro amin'i Vola noho ity vahiny tsy nampoizina ireo mpanampy roa vavy ao amin-dry Dera. Noheverin'izy ireo fa fisoloana toerana an'i Vola mihitsy aza no anton'izao fiantranoana tampotampoka izao. Hany ka izay zavatra rehetra nitranga, nanaovan'izy roa vavy andrimaso tsy mikimpy, eny na dia efa hatrany am-pandriana matory aza.

Ny reniny no niandry an'i Vola tany amin'ny hopitaly iny alina nahaterahany iny. Lalina nefa ny adin-tsain'i Dera mandrapahatongan'ny fotoana nampahafantarana an'i Vola ny zava-nitranga rehetra tamin'ny fiantranoan'i Soa tao an-tokantranony, izay tsy niafina tamin'ireo mpanampy azy ireo sy ny rafozam-baviny.