25 febroary 2025 — Talata, Herinandro Tsotra fahafito Mandavantaona — Niantso antsika tamin’ny alalan’ny Evanjely Andriamanitra mba hahazoantsika ny voninahitr’i Jesoa Tompontsika — Evanjely Masina nosoratan’i Masindahy Marka (Mk. 9, 29-36)

Amin’alalan’ny fiombonana aina amin’i Jesoa Kristy no ahafantaran’ny olona antsika hoe kristianina. Fiombonana aina midika hoe, miara-mifaly sy miara-ory aminy, mandray amin’ny fiainany na amin’ny mora na amin’ny sarotra. Tsy tao an-tsain’ireo mpianany anefa izany fa ny fibatana ilay tapany faharoa amin’ny fiainan’ilay Mpampianatra arahin’izy ireo no nimatematesany sy nifamaliany teny an-dàlana, hany ka voatery nampahatsiahy azy ireo ny làlana tsy maintsy hizorany i Jesoa.

Làlana mifono fanetren-tena, làlana mitaky toe-tsaim-panompoana ny hafa, fa làlana ahatsapana ny lanjan’ny fanekena hanara-dia tahaka ny zazakely manara-dia ireo ray aman-dreniny sy matoky amin’izay làlana itantanany ity zanany.