27 septambra 2024 — Masindahy Vincent de Paul, Pretra, Mpiaro faharoa an'i Madagasikara — Fankalazana — Ato amiko ny Fanahin’ny Tompo, fa nanosotra ahy hitory teny soa mahafaly amin’ny malahelo Izy sy naniraka ahy hankahery ny torotoro fo — Evanjely Masina nosoratan’i Masindahy Matio (Mt. 9, 35-38)

Asehon’i Jesoa ao amin’ny Evanjely ny toetra mila volentsika hananana eo am-pitoriana ny Evanjeliny: fahavononana handeha hanatona ireo itoriana; fiahiana ny fahasalaman’izy ireo; fangorahana manoloana ny fijaliana sy ny fahantrany. Mila omanina dieny izao amin’ny fiainana mandrakizay ihany koa ireo olona anirahan’Andriamanitra antsika hitoriana ny Vaovao Mahafaly. Miresaka mahakasika ny fotoam-pijinjana ny Evanjely, izany hoe fotoana farany hitsaran’Andriamanitra antsika olombelona. Manana adidy hanomana amin’izany isika kristianina, noho ny Batemy noraisintsika.

Mila mahatsapa ihany koa anefa isika fa Andriamanitra no tompon’ny lahatra; Izy no maniraka antsika koa rariny sy hitsiny raha angatahana sy italahoana Izy, haniraka mpiasa amin’ny sahany; mila angatahana Izy hambomba ny asam-pitoriana efa natombotsika.