22 avrily 2025 — Talata amin'ny Havaloan'ny Paka — Ity no andro nataon’ny Tompo, ka mifalia sy miravoa isika — Evanjely Masina nosoratan’i Masindahy Joany (Jo. 20, 11-18)

Ry kristianina havana; miasa ao anaty mistery Andriamanitra; rehefa mitambatra iny ny fahoriana dia eo indrindra no miasa Izy. Jereo ity Maria ilay nanara-dia an’i Jesoa: novonoin’ny olona ilay tompony narahany tamim-pitiavana, ilay ninoany sy nankatoaviny; avy eo koa mbola nisy nangalatra indray ny fatiny, dia niondrika nitomany izy; fa eo indrindra no manambara vaovao mahafaly Andriamanitra. Mitodiha any amin’ny Tompo; mitrakà mibanjina an’i Jesoa ary ankino aminy ny fanantenana fa ho tonga Paka fandresena io zoma masina lalovantsika io.

Vokatry ny Paka dia vavan’i Jesoa nitsangan-ko velona mihitsy no milaza amin’ireo mpianany hoe “rahalahiko” sy miantso hoe “Raiko sy Rainareo, Andriamanitro sy Andriamanitrareo”. Tonga iray tampo amin’i Kristy satria rahalahy sy anabaviny ary zanaky ny Ray ao Aminy. Izany no fahasoavan’ny Paka: fanandratana antsika any amin’ny voninahitr’Andriamanitra. Tonga miray tombon-tsoa aminy.

Avy nihaona tamin’i Jesoa i Maria Madelenina dia lasa nitory: novonjena izy mba hitory famonjena koa; noafahana tamin’ny tahotra mba hitory fahafahana koa, satria arakaraka ny izarana ny hafaliana sy ny finoana no mampitombo ny hafaliana sy ny finoana. Alao hery àry: torio izay inoantsina ary iaino izay inoana sy toriantsika. Amen.