Tohizantsika hatrany izao fandinihana sy fibanjinana masina ataotsika izao ka androany indray isika dia hifampizara ny hoe: “toe-po sy toe-panahin’ny olona mivavaka”. Fandinihina masina iarahana amin'i P. Aimé Olivier Mahatsangindrainy, Sdb

Ny toe-po, toe-panahy na toe-tsain’olona mivavaka dia tsy ilay mahazatra antsika an-davanandro iny ihany, dia ny: mangataka famantarana, miandry fahagagana, mangataka zavatra, mangataka fahasitranana na miandry homena fotsiny ary rehefa tsy afa-po, satria tsy tanteraka izany fikasana sy faniriana izany dia mimenomenona ary miongotra sy mandao ny Eglizy mihitsy aza. Tsy izany ny toe-panahin’olona mpivavaka sy mino an’Andriamanitra. Ekena fa samy ilaintsika eo amin’ny fiainana izany rehetra izany ary azon’Andriamanitra tanterahina izany raha ilaina amin’ny hampitombo ny finoantsika azy ary anehoany ny fitiavany antsika. Fa alohan’izany rehetra izany sy alohan’ny hangataka fitahiana sy fahasoavana dia ilaina isika hanana toe-po sy toe-panahy miezaka hanana fifandraisam-pitiavana sy fitokisana amin’Andriamanitra amin’ny maha Ray azy sy maha zanaka antsika. Satria, ny ivavahana amin’Andriamanitra dia tsy ny hoe “mba tsy harary, na koa mba tsy ho azon-doza, na koa hoe tsy ho azon’ireo fijaliana ara-dalàna eo amin’ny maha olombelona sy maha zava-boary antsika fotsiny ihany. Fa ny ivavahana amin’Andriamanitra voalohany indrindra dia ny mba hananantsika toe-po sy toe-panahy ka hisafidy ny hiaraka sy hifikitra aminy na inona na inona mitranga eo amin’ny fiainana. Izany hoe: mety ho zoim-pahoriana ihany isika mpivavaka, toy ny efa nahazo an’i Kristy nefa afaka misafidy kosa ny hiaraka aminy ao anatin’izay manjo antsika ary hanome dikany eo ain’ny famonjena ny olombelona an’ilay fijaliana sy fahoriana mahazo antsika.
Ry Andriamanitra Andriananahary Babanay o, tantano izahay zanakao mamakivaky an’izao fiainana mandalo sy sarotra eto an-tany izao mba hanana fifandraisana lalina aminao amin’ny maha zanaka anay ka hiatrehanay isanandro miaraka aminao ny fiainanay. Amen!