Vakiteny voalohany

Taratasy voalohan’i Masindahy Joany Apôstôly (1 Jo 2, 29 — 3, 6)

Izay rehetra mitoetra ao amin’Andriamanitra dia tsy manota.

Ry malala,
raha fantatrareo fa marina Andriamanitra,
dia fantaro fa izay rehetra manao ny marina
dia zanany naterany.
Endrey ity haben’ny fitiavan’Andriamanitra antsika
amin’ny iantsoana antsika hoe:
zanak’Andriamanitra,
sady tena izany tokoa isika!
Fa izao tontolo izao no tsy mahalala antsika,
dia noho izy tsy mahalala Azy.
Ry malala,
zanak’Andriamanitra isika ankehitriny,
nefa mbola tsy naseho izay ho tena toetrantsika;
fa amin’ny andro hampisehoana izany,
dia fantatsika fa hanahaka Azy isika,
satria hahita Azy araka ny tena toetrany.
Izay rehetra manana izany fanantenana izany ao aminy
dia manadio ny tenany,
mba ho madio tahaka Azy.
Izay rehetra manota dia mandika ny lalàna,
satria ny ota dia fandikana ny lalàna.
Fantatrareo anefa fa Izy no niseho
dia mba hanala ny fahotana;
ary tsy mba misy ota ao aminy.
Izay rehetra mitoetra ao aminy,
dia tsy mba manota;
ary izay manota
dia tsy mba nahita Azy na nahalala Azy.

— Izany àry ny tenin’ny Tompo.

Salamo fandinihana

Salamo 97, 1. 3de-4. 5-6

Zahao, ry vazan-tany rehetra ny vonjin’Andriamanitra.

Ihirao antsa vao ny Tompo
fa mahagaga ny zava-bitany,
fa ny tanany no namonjy,
nanampy Azy ny herin-tsandriny.

He zahao e, ry vazan-tany,
izato Vonjin’Andriamanitra.
O, ry tany, derao ny Tompo,
ka mientàna amin-karavoana.

Ndao antsao amim-baliha ny Tompo,
anaovy antsa sy fihobiana.
Feon’antsiva sy anjomara,
enti-midera ny fiandrianany.

Evanjely

Aleloia. Aleloia.

Tonga nofo ny Teny, ka nonina tatý amintsika. Izay rehetra nandray Azy dia nomeny fahazoana ho tonga zanak’Andriamanitra.

Aleloia.

Evanjely Masina nosoratan’i Masindahy Joany (Jo 1, 29-34)

Indro ny Zanak’Ondrin’Andriamanitra.

Nony nahita an’i Jesoa nanatona azy i Joany Batista
dia nanao hoe:

“Indro ny Zanak’Ondrin’Andriamanitra;
indro ilay manala ny fahotan’ny olona.
Izy ilay nantsoiko hoe:

Misy lehilahy avy ao aoriako,
sy efa tonga eo alohako,
satria talohako Izy.
Ary izaho tsy nahalala Azy,
fa mba hampisehoana Azy amin’i Israely
no nahatongavako manao batemy amin’ny rano.”

Ary nilaza marina i Joany nanao hoe:

“Efa hitako ny Fanahy Masina
nidina avy any an-danitra
toy ny voromailala ka nitoetra teo amboniny.
Ary izaho tsy nahalala Azy,
fa izay naniraka ahy hanao batemy amin’ny rano
no nilaza tamiko hoe:

Izay hitanao hidinan’ny Fanahy Masina
sy hitoerany eo amboniny
no ilay manao Batemy amin’ny Fanahy Masina.

Ary nahita aho ka milaza marina
fa Izy no Zanak’Andriamanitra.”

— Izany àry ny tenin’ny Tompo.

Vakiteny voalohany

Taratasy voalohan’i Masindahy Joany Apôstôly (1 Jo 2, 22-28)

Aoka hitoetra ao anatinareo izay renareo hatramin’ny voalohany.

Ry kristianina havana,
iza no mandainga raha tsy izay mandà
fa i Jesoa no i Kristy?
ary ny antikristy dia izay mandà
ny Ray sy ny Zanaka.
Izay rehetra mandà ny Zanaka,
dia tsy manana ny Ray koa;
fa izay manaiky ny Zanaka ihany
no manana ny Ray.
Koa aoka hitoetra ao anatinareo
izay renareo hatramin’ny voalohany.
Fa raha mitoetra ao anatinareo
izay renareo hatramin’ny voalohany,
dia mitoetra ao amin’ny Zanaka sy ny Ray koa ianareo.
Ary ny zavatra nampanantenainy antsika
dia ny fiainana mandrakizay.
Nanoratra izany ho anareo aho,
ny amin’ireo manangoly anareo.
Ary ianareo,
ilay fanosorana noraisinareo taminy
no mitoetra ao aminareo,
ka tsy mila hampianarin’olona ianareo,
fa izany fanosorana izany
no mampianatra anareo ny zavatra rehetra,
ary marina fa tsy lainga ny fampianarany,
ka tomoera ao aminy araka ny fampianarany anareo.
Ary ankehitriny, anaka, mitoera ao aminy,
mba hanan-toky isika rahefa miseho Izy,
fa tsy horoahina hiala aminy amin-kenatra
amin’ny andro hahatongavany.

— Izany àry ny tenin’ny Tompo.

Salamo fandinihana

Salamo 97, 1. 2-3ab. 3de-4

Zahao, ry vazan-tany izato vonjin’Andriamanitra.

Ihirao antsa vao ny Tompo
fa mahagaga ny zava-bitany,
fa ny tanany no namonjy,
nanampy azy ny herin-tsandriny.

Ka dia hitan’ny firenena
ny famonjeny amam-pahamarinany.
Mba tsarovy, ry Israely,
ilay Fitiavany tsy mivadika.

He zahao e, ry vazan-tany,
izao vonjin’Andriamanitra.
O ry tany, derao ny Tompo,
ka mientàna amin-karavoana.

Evanjely

Aleloia. Aleloia.

Fahiny imbetsaka Andriamanitra no niteny tamin’ny razantsika tamin’ny vavan’ny Mpaminany; nony farany, amin’izao androntsika izao kosa, dia ny Zanany mihitsy no itenenany amintsika.

Aleloia.

Evanjely Masina nosoratan’i Masindahy Joany (Jo 1, 19-28)

Eo aminareo misy anankiray tsy fantatrareo.

Izao no nambaran’i Joany Batista
raha naniraka mpisorona sy levita, avy tany Jerosalema,
hankany aminy ny Jody mba hanontany azy hoe:

“Iza moa ianao?”

Nilaza marina izy ka tsy nandà, fa nanao hoe:

“Tsy i Kristy aho.”

Dia nanontany azy izy ireo nanao hoe:

“Iza àry? i Elia va ianao?”

Fa hoy izy.

“Tsy izy aho.”

Dia hoy ireo:

“Ilay mpaminany va ianao?”

Fa hoy ny navaliny;

“Tsia.”

Ka hoy izy ireo taminy.

“Iza àry ianao,
mba hitondranay valy amin’izay naniraka anay?
Ataonao ho iza ny tenanao?”

Dia hoy izy.

“Izaho no feon’ny miantso any an’efitra hoe:
Ahitsio ny lalan’ny Tompo,
araka izay voalazan’i Izaia mpaminany.”

Ary Farisianina ireo iraka ireo.
Dia nanontany azy indray ireo ka nanao taminy hoe:

“Nahoana àry ianao
no manao batemy raha tsy i Kristy?
na i Elia, na ilay Mpaminany?”

Ka novalian’i Joany hoe:

“Izaho manao batemy amin’ny rano;
fa eo aminareo misy anankiray tsy fantatrareo,
dia ilay avy ao aoriako,
ary tsy mendrika hamaha ny kofehinkapany aza aho.”

Tany Betania an-dafin’i Jordany
izay nanaovan’i Joany batemy,
no natao izany zavatra izany.

— Izany àry ny tenin’ny Tompo.

Vakiteny voalohany

Boky Fanisana (Fan 6, 22-27)

Hiantso ny Anarako eo amin’ny zanak’i Israely izy ireo ary hitso-drano azy ireo Aho.

Tamin’izany andro izany,
dia niteny tamin’i Môizy ny Tompo nanao hoe:

“Mitenena amin’i Aarôna sy ny zanany hoe:
Hitso-drano ny zanak’i Israely ianareo,
dia hanao aminy hoe:

“Hitahy anao sy hiaro anao anie ny Tompo.
Hampamirapiratra ny tavany aminao
sy hamindra fo aminao anie ny Tompo.
Hanandratra ny tavany aminao
sy hanome fiadanana anao anie ny Tompo”.

Dia izany no hametrahany ny Anarako
amin’ny zanak’i Israely,
ary Izaho hitahy azy”.

— Izany àry ny tenin’ny Tompo.

Salamo fandinihana

Salamo 66, 2-3. 5. 6 sy 8

Hanambina sy hitahy antsika anie Andriamanitra!

Andriamanitra anie hiantra sy hitso-drano;
hampamiratiny amintsika anie ny Tavany:
ka ny herinao ho fantatra eran-tany,
ho hitan’ny firenen-drehetra ny vonjinao!

Hifaly sy hihoby anie ny fokom-pirenena,
satria Ianao mitsara ny tany ara-drariny,
mitsara ny vahoaka amim-pahamarinana,
mitondra ny fokom-pirenena eto an-tany.

Hidera Anao ny vahoaka, ry Andriamanitra,
hidera Anao anie ny vahoaka rehetra!
Andriamanitra anie hitahy antsika hatrany,
ny vazan-tany rehetra anie hatahotra Azy!

Vakiteny faharoa

Taratasin’i Masindahy Paoly Apôstôly ho an’ny kristianina tany Galasia (Gal 4, 4-7)

Nirahin’Andriamanitra ny Zanany nateraky ny vehivavy.

Ry kristianina havana,
rehefa feno ny andro,
dia nirahin’Andriamanitra ny Zanany,
nateraky ny vehivavy,
sy nateraka teo ambanin’ny Lalàna,
mba hanafaka izay teo ambanin’ny Lalàna,
sy handraisantsika ny fananganan-janaka.
Ary noho ny maha-zanaka anareo,
dia nirahin’Andriamanitra
ho ao anatin’ny fonareo
ny Fanahin’ny Zanany, ka miantso hoe:

“Abà, Ray!”

Koa tsy mpanompo intsony àry ianareo,
fa zanaka,
ary rehefa zanaka,
dia mpandova koa,
noho ny ataon’Andriamanitra.

— Izany àry ny tenin’ny Tompo.

Evanjely

Aleloia. Aleloia.

Fahiny, tamin’ny fomba samihafa, dia efa niteny tamin’ny razantsika Andriamanitra, tamin’ny vavan’ny Mpaminany; fa amin’izao andro farany izao kosa, dia tamin’ny alalan’ny Zanany no nitenenany tamintsika.

Aleloia.

Evanjely Masina nosoratan’i Masindahy Lioka (Lk 2, 16-21)

Nahita an’i Maria sy i Jôsefa ary ny Zazakely izy ireo... Rehefa afaka ny havaloana, dia natao hoe Jesoa ny Anarany.

Tamin’izany andro izany,
dia nandeha haingana nankany Betilehema ny mpiandry ondry
ka nahita an’i Maria sy i Jôsefa ary ny Zazakely
mandry amin’ny fihinanam-bilona;
ary rehefa nahita izy ireo,
dia nampiely ny teny nolazaina taminy
ny amin’izany Zaza izany.
Ary izay rehetra nandre
dia gaga avokoa
tamin’izay nolazain’ny mpiandry ondry taminy;
fa i Maria kosa
nitadidy izany zavatra rehetra izany,
ka nieritreritra azy tao am-pony.
Ary nody ny mpiandry ondry
nidera sy nankalaza an’Andriamanitra
noho ny zavatra reny sy hitany,
araka izay nolazaina taminy.
Ary rehefa afaka ny havaloan’andro
ka hoforàna ny Zaza
dia natao hoe Jesoa no Anarany
araka ilay nataon’ny Anjely
fony tsy mbola notorontoronina tao an-kibo Izy.

— Izany àry ny tenin’ny Tompo.