Vakiteny voalohany

Bokin’i Zakaria Mpaminany (Zak. 8, 1-8)

Indro Aho hanafaka ny vahoaka avy any atsinanana sy avy any andrefana.

Tonga ny tenin’ny Tompon’ny tafika nanao hoe:

“Saro-piaro dia saro-piaro an’i Siôna Aho,
sady entim-pahatezerana mafy Aho, noho ny aminy.
Tafaverina eto Siôna Aho,
ka te-honina eo afovoan’i Jerosalema;
i Jerosalema hantsoina hoe:

‘Ny tanànan’ny fahamarinana’;

ary ny tendrombohitry ny Tompon’ny tafika, hatao hoe:

‘Ny tendrombohitry ny fahamasinana.’

Mbola hisy anti-dahy sy anti-bavy indray,
hipetraka eny amin’ny kianja any Jerosalema,
samy hitana tehina avy noho ny andro niainany efa maro.
Ny kianjan’ny tanàna ho feno zazalahy aman-jazavavy
milalao eny amin’ny kianjany.
Amin’izany andro izany,
na hiseho ho zava-mahagaga aza izany
eo imason’izay sisa amin’itý firenena itý;
moa ho zava-mahagaga eo imasoko koa va izany?
— teny marin’ny Tompon’ny tafika —.
Indro Aho hanafaka ny vahoakako avy any amin’ny tany atsinanana sy ny tany andrefana; hoentiko mody izy honina ao afovoan’i Jerosalema,
ka izy ho vahoakako ary Izaho ho Andriamanitr’izy ireo
amin’ny rariny sy ny hitsiny.”

— Izany àry ny tenin’ny Tompo.

Setriny

Salamo 101, 16-18. 19-21. 29 sy 22-23

Hanorina an’i Siôna ny Tompo, ka hiseho anatin’ny Voninahiny.

Hatahotra ny Anaran’ny Tompo ireo firenena,
ny voninahitrao, ny Mpanjaka rehetra eran-tany!
Ny Tompo mantsy hanorina an’i Siôna,
ka hiseho anatin’ny voninahiny,
hanatrika ny vavak’izay norobaina,
tsy hanosika ny talahon’izy ireo!

Soraty izany ho an’ny taranaka any aoriana:
ka hidera ny Tompo ny vahoaka mbola ho àry!
Avy any an-toerany Masina any ambony Izy mitsinjo,
avy any an-danitra ny Tompo no mitazana ny tany:
hahahenoany ny senton’ny mpifatotra,
hanafahany an’ireo voatondro hovonoina.

Ny zanaky ny mpanomponao handry fehizay,
ary ny taranany hijoro eo anoloanao!
Ka ho voatantara ao Siôna ny Anaran’ny Tompo,
sy ao Jerosalema ny fiderana Azy,
raha ho tafaray mba hanompo ny Tompo
ireo vahoaka sy ireo fanjakana!

Evanjely

Aleloia. Aleloia.

Misaotra Anao aho, ry Ray, Tompon’ny lanitra sy ny tany, fa nambaranao tamin’ny madinika ny tsiambaratelon’ny Fanjakanao.

Aleloia.

Evanjely Masina nosoratan’i Masindahy Lioka (Lk. 9, 46-50)

Izay kely indrindra eo aminareo no ho lehibe indrindra.

Tamin’izany andro izany,
nisy hevitra tonga tao an-tsain’ireo mpianatra,
dia ny amin’izay lehibe aminy.
Fantatr’i Jesoa ny hevitra tao am-pony,
ka naka zaza kely anankiray Izy napetrany teo anilany,
dia hoy Izy tamin’izy ireo:

“Na iza na iza mandray itony zaza kely itony amin’ny Anarako
dia mandray Ahy,
ary na zovy na zovy mandray Ahy dia mandray Ilay naniraka Ahy;
fa izay kely indrindra eo aminareo rehetra
dia izy no lehibe.”

Dia niteny i Joany nanao hoe:

“Ry Mpampianatra ô,
nahita olona anankiray nandroaka demony tamin’ny Anaranao izahay,
ka noraranay,
satria tsy namantsika izy.”

Fa hoy i Jesoa taminy:

“Aza raràna,
fa izay tsy manohitra anareo dia momba anareo.”

— Izany àry ny tenin’ny Tompo.

Vakiteny voalohany

Bokin’i Ezekiela Mpaminany (Ezek. 18, 25-28)

Raha miala amin’ny haratsiana nataony ny ratsy fanahy, dia hamelona ny fanahiny.

Izao no nolazain’ny Tompo: Ianao manao hoe:

“Tsy marina ny lalan’ny Tompo!”

Mihainoa àry, ry taranak’i Israely:
Moa ny lalako va no tsy mahitsy?
Moa tsy ny lalanareo va no tsy mahitsy?
Raha miala amin’ny fahamarinany ny marina,
ka manao ny tsy marina ary maty amin’izany,
dia noho ny tsy marina nataony no ahafatesany.
Fa raha miala amin’ny haratsiana nataony kosa ny ratsy fanahy
ka manaraka ny hitsiny sy ny rariny amin’ny ataony,
dia hamelona ny fanahiny izy.
Raha sokafany ny masony,
ka miala amin’ny fahadisoana rehetra nataony izy,
dia ho velona tokoa izy fa tsy ho faty.

— Izany àry ny tenin’ny Tompo.

Salamo fandinihana

Sal. 24, 4-5ab. 6-7. 8-9

Tsarovy, ry Tompo, ny famindram-ponao.

Ny lalanao, ry Tompo, atoroy ahy;
ampianaro ahy ny soritrao.
Ny fahamarinanao itarihana ahy,
Ianao no Andriamanitra Vonjiko.

Tsarovy ny indrafonao sy ny fitiavanao
izay efa hatramin’ny fahagola.
Noho ny fitiavanao, ry Tompo,
hadinoy ny otako fahazaza.

Tsara sy mahitsy ny Tompo:
ny mpanota toroany lalana,
ny ory entiny amin’ny marina,
asehony azy ireo ny lalany.

Vakiteny faharoa

Taratasin’i Masindahy Paoly Apôstôly ho an’ny kristianina tany FiIipy (Fil. 2, 1-11)

Manàna ny saina amam-po hita tao amin’i Kristy Jesoa.

Ry kristianina havana,
raha mba manana famporisihana ao amin’i Kristy koa ianareo,
na manana fanalana alahelo amin’ny fitiavana ihany,
raha misy firaisam-po amam-panahy koa amintsika,
ka mba misy fitserana amam-pangorahana ahy ihany aminareo,
dia fenoy tanteraka ny hafaliako amin’ny firaisanareo saina,
ka hiray fitiavana, hiray fo, hiray hevitra,
tsy hanao na inona na inona amin’ny fifampiandaniana
na filan-dera foana,
fa samy hanetry tena sy hanao ny namany ho ambony noho ny tenany avy,
samy tsy hihevitra ny azy ihany,
fa ny an’ny namany koa.
Manàna ny saina amam-po hita tao amin’i Kristy Jesoa, dia izao:
na dia tao amin’ny fomban’Andriamanitra aza Izy,
dia tsy nihevitra ny fitoviany saranga amin’Andriamanitra
ho zavatra nobaboiny,
fa nialàny izany tamin’Izy naka ny fomban’ny mpanompo,
ka tonga mitovy amin’ny olombelona,
sy hita ho olombelona tamin’ny fisehoany rehetra,
ary nilatsa-tenany ho ambany,
nanolo-tena hanaiky hatramin’ny fahafatesana,
dia fahafatesana tamin’ny Hazofijaliana.
Ho valin’izany kosa,
dia nasandratr’Andriamanitra ambony indrindra Izy,
sy nomeny Anarana mihoatra ny anarana rehetra,
mba handohalika amin’ny Anaran’i Jesoa avokoa ny lohalika rehetra,
na ny any an-danitra, na ny ety an-tany, na ny any ambany,
ary mba hanaiky avokoa ny lela rehetra,
fa i Jesoa Kristy dia Tompo efa niditra amin’ny voninahitr’Andriamanitra Ray.

— Izany àry ny tenin’ny Tompo.

Vakiteny faharoa

Taratasin’i Masindahy Paoly Apôstôly ho an’ny kristianina tany FiIipy (Fil. 2, 1-5)

Manàna ny saina amam-po hita tao amin’i Kristy Jesoa.

Ry kristianina havana,
raha mba manana famporisihana ao amin’i Kristy koa ianareo,
na manana fanalana alahelo amin’ny fitiavana ihany,
raha misy firaisam-po amam-panahy koa amintsika,
ka mba misy fitserana amam-pangorahana ahy ihany aminareo,
dia fenoy tanteraka ny hafaliako amin’ny firaisanareo saina,
ka hiray fitiavana, hiray fo, hiray hevitra,
tsy hanao na inona na inona amin’ny fifampiandaniana
na filan-dera foana,
fa samy hanetry tena sy hanao ny namany ho ambony noho ny tenany avy,
samy tsy hihevitra ny azy ihany,
fa ny an’ny namany koa.
Manàna ny saina amam-po hita tao amin’i Kristy Jesoa.

— Izany àry ny tenin’ny Tompo.

Evanjely

Aleloia. Aleloia.

Izaho no lalana sy fahamarinana ary fiainana, hoy ny Tompo. Tsy misy afaka mankany amin’ny Ray afa-tsy amin’ny alalako.

Aleloia.

Evanjely Masina nosoratan’i Masindahy Matio (Mt. 21, 28-32)

Nanenina izy ka nandeha ihany. Ny poblikanina sy ny vehivavy janga no efa mialoha anareo, ho amin’ny Fanjakan’Andriamanitra.

Tamin’izany andro izany,
i Jesoa niteny tamin’ny lohandohan’ny mpisorona sy ny loholona nanao hoe:

“Ahoana no hevitrareo?
Nisy lehilahy anankiray nanan-janaka roa lahy,
dia nanatona ny lahy matoa izy ka nanao taminy hoe:

‘Andeha, anaka, miasa any amin’ny tanimboaloboka anio’.

Fa hoy izy:

‘Tsy handeha aho’.

Kanjo nony afaka izany,
nanenina izy ka nandeha ihany.
Dia nankeo amin’ilay iray indray izy ka nilaza toraka izany koa.
Hoy io:

‘Handeha aho, tompoko’;

kanefa tsy nandeha izy.
Iza moa amin’izy roa lahy no nanao ny sitra-pon’ny rainy?”

Hoy ireo:

“Ny lahy matoa”.

Dia hoy i Jesoa taminy:

“Izaho milaza marina aminareo
fa ny poblikanina sy ny vehivavy janga no efa mialoha anareo,
ho amin’ny Fanjakan’Andriamanitra;
fa tonga teo aminareo tamin’ny lalan’ny fahamarinana i Joany,
nefa ianareo tsy nino azy;
fa ny poblikanina sy ny vehivavy janga no nino azy;
ary ianareo, na dia nahita izany aza,
dia tsy mbola nanenina akory mba hinoanareo azy”.

— Izany àry ny tenin’ny Tompo.

Vakiteny voalohany

Bokin’i Zakaria mpaminany (Zak. 2, 5-9a. 14-15a)

Indro tamy Aho ary honina eo afovoanao.

Nanopy ny masoko aho, ka nahita:
ka indro nisy lehilahy nitondra kofehy famolaina teny an-tanany.
Dia hoy aho:

“Ho aiza ianao?”

Ary hoy izy tamiko:

“Handrefy an’i Jerosalema
hahitana izay hatao sakany sy izay hatao lavany.”

Tamin’izay niseho ilay Anjely niresaka tamiko,
sady nisy Anjely anankiray hafa niseho hitsena azy;
ka hoy izy taminy hoe:

“Mandehàna faingana,
milazà amin’io zatovo io, ataovy hoe:
Honenana toy ny tanàna tsy mimanda i Jerosalema,
fa ho betsaka loatra ny olona sy ny biby ao aminy.
Ary Izaho,
— teny marin’ny Tompo —
no ho manda afo manodidina azy
sy hahazo voninahitra eo afovoany.
Manaova hobim-pifaliana sy miravoravoa, ry zanakavavin’i Siôna,
fa indro Aho tamy, ary honina ao afovoanao,
— teny marin’ny Tompo —.
Amin’izany andro izany,
maro ny firenena hiraiki-po amin’ny Tompo,
ka ho vahoakako izy ireo;
ary Izaho honina ao afovoanao.”

— Izany àry ny tenin’ny Tompo.

Setriny

Salamo: Jer. 31, 10. 11-12ab. 13

Ny Tompo miandry antsika toy ny mpiambina miambina ny ondry.

Henoy, ry firenena, ny tenin’ny Tompo,
ampandreneso ny Nosy any lavitra!
Ilay nampiely an’i Israely dia hanangona,
ary ho toy ny mpiandry miambina ny ondriny.

Eny, ny Tompo hanafaka an’i Jakôba,
sy hanavotra azy amin’ny tanan’ny mahery noho izy.
Ka ho avy amina hobin-kafaliana izy ireo
eny amin’ny havoan’i Siôna,
hankafy ny zava-tsoan’ny Tompo: ny vary sy divay,
diloilo, zanak’omby aman’ondry!

Amin’izay ny tovovavy dia hifaly amin-dihy;
ny tovolahy, ny zokiolona koa dia hitavana!
Ny fisaonany hampodìko ho haravoana,
hafaliana no hatambiko ny fahoriany!

Evanjely

Aleloia. Aleloia.

Omeo fahalalana aho, ry Tompo, hitandremako ny lalànao ary hanarahako azy amin’ny foko tontolo.

Aleloia.

Evanjely Masina nosoratan’i Masindahy Lioka (Lk. 9, 44b-45)

Tsy maintsy hatolotra eo am-pelatanan’ny olona ny Zanak’Olona.

Tamin’izany andro izany,
raha ilay mbola gaga tamin’izay rehetra nataon’i Jesoa iny ny vahoaka rehetra,
dia hoy i Jesoa tamin’ny mpianany:

“Alatsaho tsara ao amin’ny sofinareo izao rehetra izao,
satria tsy maintsy hatolotra eo am-pelatanan’ny olona ny Zanak’Olona.”

Fa tsy azon’izy ireo izany teny izany,
fa takona taminy ka tsy fantany,
sady tsy sahy nanontany Azy ny amin’izany izy.

— Izany àry ny tenin’ny Tompo.